Жарысқа облыс аудандары мен Қонаев қаласынан келген 2005–2008 жылдары туған 70-тен астам ұлдар мен қыздар қатысуда.
Ұлдар асық ату жарысында бақ сынауда. Бұл – қарсыластың асығын дәлдікпен атып түсіруді қажет ететін дәстүрлі ойын. Қыздар болса бес асық ойыны арқылы өздерінің ептілігі мен шапшаңдығын, зейінін және қимыл үйлесімділігін көрсетуде.
Жетекші жаттықтырушы Еркін Рақымбаевтың айтуынша, қазіргі таңда өңірде бұл ұлттық ойындармен 1000-нан астам адам тұрақты түрде айналысады. Асық ату мен бес асық – енді тек ермек емес, толыққанды спорт түріне айналған.
«Бұл чемпионат – жай ғана жарыс емес, халқымыздың ғасырлар бойғы тарихын бейнелейтін рухани дәстүрдің жалғасы», – деді Еркін Рақымбаев.
Жарыста Қонаев қаласы мен Еңбекшіқазақ, Қарасай, Талғар және Жамбыл аудандарынан келген мықты командалар жоғары нәтиже көрсетуде. Облыстық турнирдің жеңімпаздары 18–23 тамыз аралығында Ақтөбе қаласында өтетін Қазақстан біріншілігіне жолдама алады.
