Балқаш ауданында 28 мың 824 гектар суармалы егістік бар. Оның 14 мың 600 гектары мал азықтық дақылдар көп жылдық шөптер. 600-ге жуық гектары бір жылдық шөптер. 190 гектар жем-шөп бар.
Қазіргі уақытта, мал азығын ору науқаны қарқынды жүріп жатыр. 2560,0 гектар арпа-бидай шабылып, оның 1890 гектары бастырылды. Орташа өнімділігі 18,0 ц. Жалпы түсім 3402,0 тоннаны құрайды. Ал шөп ору науқаны бойынша 2 орылым басталып, нақты шабылғаны 6080,0 га. Оның 3880,0 гектары бастырылды. Орташа өнімділігі 15 ц/га, жалпы түсім 5820,0 тоннаны құрайды.
Бұл туралы бізге толығырақ «Балқаш ауданының ауылшаруашылығы бөлімі» ММ-нің басшысы Бүркіт Амангелдіұлы Мұханов айтып берді.
«Біз өзіміздің ауданды 90 мың тонна мал азығымен қамтамасыз етеміз. Бұл өңір қажеттілігін толық өтейді. Одан бөлек, Алматы облысы бойынша мал азығының 70%-ы біздің үлесіміз. Сонымен қатар, Қарағанды, Жамбыл және Семей облыстарына да жөнелтеміз. Бұл жағынан ешқандай қиындық туындаған жоқ. Бақанас магистральді каналында су толығымен жеткілікті»,- дейді Бүркіт Мұханов.
Алайда бөлім басшысының айтуынша, жоғарғы аймақта Тасмұрын магистральді каналының Іле арнасына ауып кетуіне байланысты су қабылдау бекетінде су жетіспей жатыр екен.
«Күрішке келсек, суды үнемдеу технологиялары қиындық тудырады. Сол үшін каналдарымызды бетондап берсе екен дейді», — ол.
Айта кетейік, ауданда тыӊайтқыштармен өңдеу дрон жүйесімен жүргізілуде, бұл өнім сапасын арттыруға оң әсерін беріп отыр.
Қорыта айтқанда, Балқаш ауданы ауыл шаруашылығы саласында тұрақты даму көрсетіп отыр. Жартыжылдық көрсеткіштер жоспарлы деңгейде орындалып келеді. Осы қарқынмен жалғаса берсе, жыл соңына дейін межеленген мақсатқа жетеді деген сенімдеміз.
