Өрт туралы хабар Қарасай ауданына қарасты Жандосов ауылының тұрғындарынан Алматы облыстық Төтенше жағдайлар департаментінің кезекші бөліміне түскен.
«Оқиға орнына Алматы облысы мен Алматы қаласы ТЖД-ның 8 қызметкері мен 2 арнайы техникасы шұғыл жетті. Өрт аумағына келген кезде шамамен 1 гектар жерде құрғақ шөп пен 50 шақты ағаштың жанып жатқаны анықталды», — делінген ведомство таратқан ресми хабарламада.
Төтенше жағдайлар департаментінің мәліметінше, өрт сағат 21:56-да толықтай сөндірілген. Оқиға салдарынан қаза тапқандар мен зардап шеккендер жоқ.
Қазіргі уақытта өрттің шығу себебі анықталуда. Төтенше жағдайлар қызметі азаматтарды дала мен жол бойындағы өрт қауіпсіздігі талаптарын қатаң сақтауға шақырады.
