Бұл бастама ауыл шаруашылығы саласына тың серпін беріп, өңірлік экономиканың дамуына оң әсерін тигізіп отыр.
Бағдарламаны қаржыландыру кезең-кезеңімен жүзеге асырылуда. 2023 жылы 15 млрд теңге бөлінсе, 2024 жылы қосымша 5 млрд теңге бағытталды. Ал биыл республикалық бюджеттен тағы 8 млрд теңге бөлу жоспарланып отыр. Бұл туралы «Қонаев» ӘКК басқарма төрағасы Мұрат Абдығұлов мәлімдеді.
2024 жылдың қорытындысы бойынша корпорацияның қолдауымен қаржыландырылған 13 сүт-тауар фермасы 38 042 тонна сүт өндірген. Бұл – өткен жылмен салыстырғанда 5 000 тоннаға артық (2023 жылы – 33 088 тонна). Аталған кәсіпорындарда бүгінде 709 адам тұрақты жұмыспен қамтылған. Барлық жобалар толық қуатына шыққанда жылдық өндіріс көлемі 68 000 тоннадан асып, жұмыс орындарының саны 838-ге жетуі мүмкін.
Еңбекшіқазақ ауданындағы үлгілі жоба
Сүт бағытындағы табысты жобалардың бірі – Еңбекшіқазақ ауданындағы «Әлімжанов» шаруа қожалығы. Жоба «Қонаев» ӘКК-нің қаржылық қолдауы арқылы елеулі жетістікке жетті. Кәсіпкер Тілек Әлімжанов кеңестік кезеңде салынған ескі ферманы қайта қалпына келтіріп, өткен жылы жеңілдетілген несие арқылы Чехиядан симментал тұқымының 96 бас ірі қара малын сатып алды. Қазір шаруашылықтағы сауын табыны 850 басқа дейін көбейген.
«Шаруашылықта заманауи технологиялар мен селекциялық-асылдандыру жұмыстары енгізілген. Малға жайлы жағдай жасалған. Қазір бір сиырдан жылына орта есеппен 5,5 тонна сүт алынып отыр. Еуропадан әкелінген ірі қара жаңа ортаға тез бейімделіп, төлдей бастады», – дейді фермер.
Фермада бүгінде 100-ден астам адам еңбек етеді, олардың басым бөлігі – жергілікті тұрғындар. Жұмысшылар үшін тегін тамақ, тасымал және әлеуметтік қолдау қарастырылған. Бұл – ауыл тұрғындары үшін тұрақты жұмыс пен лайықты тұрмыс сапасының кепілі ғана емес, сонымен қатар агроөнеркәсіп саласына көрсетілетін қолдаудың нақты нәтижесі екенінің айқын дәлелі.
Бағдарлама шарттары және кеңейту әлеуеті
АӨК-ті несиелеу бағдарламасы Солтүстік Қазақстан облысының оң тәжірибесіне негізделіп әзірленген. Ол сүт бағытындағы ірі қара сатып алу, сүт-тауар фермаларын, құс фабрикаларын, көкөніс қоймаларын, ауыл шаруашылығы өнімдерін өңдейтін кәсіпорындарды салу немесе жаңғырту үшін қажет жабдық алуға жеңілдетілген несие ұсынуды көздейді.
Бағдарлама шарттарына сәйкес:
Несиелеу мерзімі – 10 жылға дейін;
Сыйақы мөлшерлемесі – жылдық 2,5%;
Жеңілдік кезеңі – 24 айға дейін;
Максималды сома – 5 млрд теңге.
Бүгінгі таңда бағдарлама аясында Алматы облысына 1 498 бас сүт бағытындағы ірі қара мал жеткізілді. Бұл көрсеткіштер өңірдегі сүт өндірісінің артуына, жұмыс орындарының көбеюіне және ауылдағы өмір сапасының жақсаруына айтарлықтай әсер етіп отыр.
