Тергеу барысында анықталғандай, ер адам әлеуметтік жағынан аз қамтылған отбасыларға арналған мемлекеттік ипотекалық бағдарлама аясында баспана рәсімдеуге көмектесемін деп уәде берген. Ол пәтерді төмен пайызбен, небәрі екі-үш айдың ішінде алып бере алатынын айтып, азаматтардың сеніміне кірген.
Нәтижесінде 47 адам күдіктіге жалпы сомасы 110 миллион теңге көлемінде ақша тапсырған. Жәбірленушілер күткен баспаналары уәде етілген мерзімде берілмеген соң полицияға шағымданған.
Тексеру барысында ер адамның жоғары білімі болғанымен, ресми түрде еш жерде жұмыс істемегені белгілі болды.
Құқық қорғау органдары тергеу барысында жеткілікті дәлелдер жинап, күдіктінің кінәсі толық дәлелденді. Сот шешімімен ол 4 жыл 8 айға бас бостандығынан айырылды. Сонымен қатар, сот оны жәбірленушілерге 75 миллион теңге көлемінде материалдық шығынды өтеуге және сот шығындарын жабуға міндеттеді.
Құзырлы органдар тұрғындарды күмәнді ұсыныстарға сенбеуге және мемлекеттік бағдарламаларға қатысты ақпаратты тек ресми дереккөздерден ғана тексеруге кеңес береді.
