Кездесуде облыстың әлеуметтік-экономикалық дамуына серпін беретін басты драйверлердің бірі – инвестициялық саясатты жетілдіру мәселесі негізгі назарда болды.
Облыс тұрақты өсім қарқынын көрсетіп келеді. Биылғы жылдың қаңтар-маусым айлары аралығында негізгі капиталға салынған инвестиция көлемі 421,6 млрд теңгені құрап, өткен жылдың сәйкес кезеңімен салыстырғанда 24,7 пайызға артты. Оның ішінде жекеменшік инвестиция көлемі 288,6 млрд теңгені құрап отыр. Бұл – кәсіпкерлік белсенділіктің жоғары деңгейде екенін және бизнестің өңірлік жобаларға сеніммен қарап отырғанын аңғартады.
Алматы облысы республика бойынша инвестиция тарту көрсеткіші жағынан да алдыңғы қатарда. Бүгінде өңірдің жалпыұлттық инвестициялық үлесі 5,2%-ға жеткен. Бұл – облыстың инвестициялық тартымдылығының артып келе жатқанын білдіреді.
Отырыста сондай-ақ шетелдік капитал тарту мәселесі де талқыланды. Тікелей шетелдік инвестиция көлемі I тоқсан қорытындысы бойынша 210,7 млн АҚШ долларын құраған. Бұл – өткен жылдың сәйкес кезеңімен салыстырғанда 1,5 есе жоғары көрсеткіш. Мұндай серпін өңірдің халықаралық әріптестіктегі ашықтығы мен тұрақты инвестициялық ахуалын көрсетеді.
Облыс әкімі Марат Сұлтанғазиев өз сөзінде инвестицияларды тарту тек экономикалық өсім ғана емес, жаңа жұмыс орындарын құру, өндіріс көлемін ұлғайту және халықтың өмір сүру сапасын арттыру үшін маңызды екеніне назар аударды. Оның айтуынша, Алматы облысында проактивті тәсілдер мен заманауи құралдар қолданылып жатыр. Атап айтқанда, өңірде арнайы цифрлық инвестициялық платформа іске қосылған, өңірлік инвестициялық штаб жүйелі түрде жұмыс істейді, нақты инвестициялық жобалар портфелі жасақталған.
Жиын барысында екінші жартыжылдыққа арналған басым бағыттар да белгіленді. Ең алдымен, қолда бар жобалардың іске асырылуын жеделдету, инфрақұрылымдық қолдау тетіктерін кеңейту және шетелдік әріптестермен жаңа келісімдерге келу – негізгі міндеттердің қатарында.
Жалпы алғанда, Алматы облысы инвестиция тарту бағытында қарқынды дамып келеді. Бұл үрдіс өңір экономикасының әртараптануына, жаңа өндіріс ошақтарының ашылуына және жалпы аймақтың әлеуметтік-экономикалық әлеуетінің артуына жол ашатыны сөзсіз.
