Жоба аясында Кайнар ауылдық округіне қарасты Жалғамыс ауылында 900 орындық жаңа мектептің құрылысы аяқталып, алғашқы оқушыларын қабылдай бастады. Бұл ауыл тұрғындары үшін көптен күткен қуанышты жаңалыққа айналды.
Сонымен қатар, «Айғаным» шағын ауданындағы Көктал ауылында бой көтеріп жатқан 600 орындық мектептің құрылысы да мәреге таяп қалды. Жаңа оқу жылы басталғанда бұл білім ордасы да өз есігін оқушыларға айқара ашпақ.
Аудандық білім бөлімінің мәліметінше, бұған дейін Жалғамыс және Көктал ауылдарының мыңнан астам баласы көрші ауылдар мен Іле ауданына қатынап оқуға мәжбүр болған. Олар Қызыл-Ту ауылындағы №24 мектепке және Іле ауданындағы №7, 13, 24, 38 мектептерге барып жүрген. Бұл жағдай балалар мен ата-аналар үшін үлкен қиындықтар туғызған еді. Ұзақ жылдан бері тұрғындар өз ауылдарынан мектеп ашу туралы Білім министрлігіне бірнеше мәрте өтініш білдірген болатын.
Осы мәселе «Жайлы мектеп» ұлттық жобасына енгізіліп, нақты шешімін тапты. Жобалық-сметалық құжаттаманы әзірлеу бір жылға жуық уақытты алды. Құрылыс жұмыстары республикалық бюджет есебінен қаржыландырылуда. Тапсырыс беруші – «Самұрық-Қазына» қоры болса, мердігер ұйым ретінде «KazSMU» ЖШС жұмыс атқаруда. Нысанды биылғы қазан айында толық тапсыру жоспарланған. Қазіргі таңда құрылыс жұмыстары 90 пайызға орындалды: мектеп ғимаратының қаңқасы толық аяқталған, ішкі әрлеу жұмыстары, инженерлік желілерді тарту және аумақты абаттандыру шаралары жүріп жатыр.
Жаңа білім ордасында кітапхана, кең асхана және заманауи спорт залы қарастырылған. Ғимарат барлық санитарлық-гигиеналық және сәулет-құрылыс талаптарына толықтай сәйкес келеді.
Бұл білім нысандары – өңірдегі әлеуметтік инфрақұрылымды жақсартуға бағытталған кешенді жұмыстың жемісі. Жобаның жүзеге асуы арқылы ауылдық жерлерде білім беру сапасы артып, балалар өз ауылында қолайлы әрі қауіпсіз жағдайда білім алу мүмкіндігіне ие болады.
