Оқу-жаттығу елдің сейсмикалық қауіпті өңірлерінде ұйымдастырылады. Атап айтқанда, жаттығу келесі қалалар мен облыстарды қамтиды:
-
Алматы және Шымкент қалалары,
-
Абай, Жетісу, Алматы, Шығыс Қазақстан, Жамбыл, Қызылорда және Түркістан облыстары.
Республикалық штаб Шымкент қаласында орналасады.
Іс-шара аясында аталған өңірлерде дабыл сиреналары қосылып, адамдар көп жиналатын нысандарда сейсмикалық қауіпсіздікке арналған жаттығулар өтеді. Тұрғындар бұл шаралардан алдын ала хабардар етіледі.
ТЖМ мәліметінше, оқу-жаттығудың негізгі мақсаты – жойқын жер сілкінісінен кейінгі төтенше жағдайларды жою кезінде азаматтық қорғау жүйесінің дайындық деңгейін тексеру және арттыру.
«Іс-шараға республикалық және өңірлік азаматтық қорғау қызметтері, сондай-ақ жергілікті атқарушы органдар қатысады. Олар жойқын жер сілкінісі жағдайында әрекет ету алгоритмін пысықтайды», – делінген министрлік хабарламасында.
Оқу-жаттығу ел тұрғындарының қауіпсіздігін қамтамасыз етуге бағытталған маңызды қадамдардың бірі болып саналады. Төтенше жағдай туындаған жағдайда жедел және үйлесімді әрекет ету – азаматтардың өмірі мен денсаулығын қорғаудың басты кепілі.
