Ведомство мәліметінше, алаяқтар өздерін медициналық ұйым қызметкерлері ретінде таныстырып, азаматтарға қоңырау шалып, СМС арқылы келген кодты айтуын сұрайды.
«Алаяқтар медициналық ұйымдардың атынан қоңырау шалып, СМС арқылы келген кодты жазып, тексеруден өтетінін растауды сұрайды. Ешқандай мемлекеттік медициналық мекеме СМС код арқылы жазбаны растауды талап етпейді», – делінген министрлік ақпаратында.
Мамандардың айтуынша, СМС арқылы келетін кодтар цифрлық сервистерге кіру немесе қаржылық операцияларды растау үшін беріледі. Мұндай кодты үшінші тұлғаларға айту жеке деректердің немесе банк шоттарының қауіпсіздігіне үлкен қауіп төндіреді.
Министрлік азаматтарды мұқият болуға және белгісіз нөмірден келген қоңыраулар мен СМС-хабарламаларға сенбеуге шақырады. Күмән тудыратын жағдайда жақын маңдағы медициналық ұйымға немесе 1414 нөміріне хабарласу ұсынылады.
Цифрлық қауіпсіздік – әр азаматтың жауапкершілігі. Сондықтан жеке деректерді қорғауға немқұрайлы қарамау маңызды.
