Іс-шара Алматы облысы әкімдігінің қолдауымен өтті. Шараны облыстық Ветеринария басқармасы, ҚР Ауыл шаруашылығы министрлігі Ветеринариялық бақылау және қадағалау комитетінің Алматы облыстық аумақтық инспекциясы және облыстық ветеринариялық станция бірлесе ұйымдастырды.
Еске салайық, 2023 жылдан бастап Ветеринария күні ресми кәсіби мерекелер тізіміне енгізіліп, жыл сайын 10 шілдеде аталып өтеді. Бұл күн — жануарлар денсаулығын қамтамасыз етіп, халықтың санитарлық қауіпсіздігіне үлес қосып жүрген ветеринар мамандардың ерен еңбегіне қоғам тарапынан білдірілетін алғыс пен құрметтің көрінісі.
Саланың үздіктері марапатталды, жаңа көліктер табысталды
Салтанатты жиын барысында ветеринария саласында жоғары жетістіктерге қол жеткізген үздік қызметкерлер марапатталды. Сонымен қатар Алматы облысы әкімінің орынбасары аудандық ветеринариялық бөлімшелерге арналған 14 жаңа қызметтік автокөліктің кілтін табыстады. Жалпы техниканың құны 104 миллион теңгені құрайды. Бұл көліктер шалғай ауылдық округтерде жұмыс істейтін мамандардың мобильділігін арттырып, қызмет сапасын жақсартуға мүмкіндік береді.
Облыс әкімінің орынбасары Бақытұлы Бақытнұр өз сөзінде:
«Бүгінгі мереке — күнделікті еңбегі көбіне көзге көрінбейтін, бірақ ел үшін стратегиялық маңызы бар мамандарға шынайы алғыс білдіру мүмкіндігі. Ветеринария жүйесінің мықты болуы – бұл тек жануарлар денсаулығы ғана емес, сонымен қатар еліміздің азық-түлік қауіпсіздігінің де кепілі. Мемлекет бұл саланың материалдық-техникалық базасын нығайтуды жалғастыра береді», — деп атап өтті.
Ардагерлерге құрмет көрсетілді, көрме ұйымдастырылды
Мерекелік бағдарлама аясында сала ардагерлеріне құрмет көрсетіліп, өнер ұжымдарының концерттік қойылымдары мен заманауи ветеринариялық жабдықтардың көрмесі өтті. Қатысушылар жаңа технологиялармен танысып, тәжірибе алмасып, саланың өзекті мәселелерін ортаға салды.
Мұндай іс-шаралар ветеринария саласындағы кәсіби қауымдастықты нығайтып, мамандықтың мәртебесін арттыруға ықпал етеді. Ветеринария күні – бұл жай ғана мереке емес, жануарлар мен қоғам денсаулығын қорғап жүрген мамандарға деген терең құрметтің көрінісі.
