Министрлік мәліметінше, Шу қаласынан Алматы облысына «бақыланатын жеткізу» әдісімен ұйымдастырылған арнайы операция нәтижесінде Қарасай ауданының «Тұрар бақшасы» елді мекенінде орналасқан есірткі өндіру орнының қызметі әшкереленді.
Операция кезінде көрші мемлекеттің екі азаматы ұсталды. Тергеу материалдарына сәйкес, олар синтетикалық есірткі заттарын өндіріп, таратумен айналысқан.
«Заңсыз айналымнан 11 килограмнан аса «мефедрон» тәркіленді. Бұл – қара нарыққа құны 1,6 миллион доллар болатын 35 мыңнан астам бір реттік доза түсуіне жол бермеді», – деді ІІМ Есірткі қылмысына қарсы іс-қимыл комитеті төрағасының міндетін атқарушы Данияр Мейрхан.
Зертханада жүргізілген тінту кезінде қосымша 20 литр және 115 келі психотроп заттар, сондай-ақ екі тоннадан астам прекурсорлар анықталды. Құқық қорғау органдарының бағалауынша, осы шикізаттардан шамамен 120 келі синтетикалық есірткі дайындалуы мүмкін еді.
Осылайша, көлеңкелі есірткі нарығына келтірілген жалпы залал көлемі 17,5 миллион долларға бағаланып отыр.
Қазіргі уақытта ұсталған күдіктілер уақытша ұстау изоляторына қамалды. Тергеу амалдары жалғасуда.
