Бүгінде ол білім беру, әлеуметтік технологиялар және мемлекеттік секторды цифрландыру салаларындағы стартаптарды дамытуға арналған платформа ретінде қызмет атқаруда.
Табысты жобалардың жарқын мысалы – QOL стартапы. Жоба инженерлік робототехниканы оқытуға арналған STEAM-комплектілерін әзірлеген. Бұл өнімдер облыстағы 10 пилоттық мектепке енгізілді, жоба 10 мың АҚШ доллары көлемінде инвестиция тартты. Сонымен қатар, РМК «Ғылым ордасы» мекемесімен бірлескен FabLab зертханасын ашу жөнінде меморандумға қол қойылды. Стартаптың алдағы мақсаты – Орталық Азия мен MENA аймағының нарығына шығу.
Тағы бір перспективалы жоба – OquMarket білім беру маркетплейсі. Бұл платформа оқушылар мен мұғалімдерге оқу процесін жекелендіруге мүмкіндік береді. Стартап сынақ кезеңінен сәтті өтіп, алғашқы пайдаланушылардан оң пікірлер алды және енді жоба еліміз бойынша кеңейтілмек.
Цифрлық технологиялар мемлекеттік секторда да қолданылуда. Alatau Hub резиденттерінің бірі облыс прокуратурасы үшін «Отбасының цифрлық картасы» жүйесіне арналған арнайы модуль әзірледі. Бұл шешім мемлекеттік қызметтердің тиімділігін арттыруға және деректерді нақты талдауға мүмкіндік береді.
Цифрлық инфрақұрылымды дамыту – өңірдің тағы бір басым бағыты. Мемлекеттік-жекеменшік әріптестік аясында облыста 9 100 бейнебақылау камерасы мен 325 бағдарламалық-аппараттық кешен орнатылып, 2 554 шақырым талшықты-оптикалық байланыс желілері тартылды.
Кеңістіктік талдау мен цифрлық модельдерді жасауға да ерекше көңіл бөлінуде. 2023 жылы облыста «Цифрлық егіз» жобасы іске қосылып, 33 елді мекенді (582,1 км²) қамтыды. Жоба аясында рельефтің 3D моделі жасалып, 1 919 шақырым инженерлік желі цифрландырылды.
Алматы облысында цифрлық трансформация қарқынды дамып келеді. Бұл өңірдің технологиялық ілгерілеуіне, халықтың өмір сүру сапасының артуына және ұлттық әрі халықаралық деңгейдегі бәсекеге қабілеттілігінің нығаюына қолайлы жағдай жасауда.
