Соттың мәліметіне сәйкес, Жамбыл облысының бұрынғы әкімі Көкірекбаев пен оның бұрынғы орынбасары аса ірі көлемде пара алғаны үшін айыпталуда. Сонымен бірге, іске тартылған ЖШС директоры аса ірі көлемде пара бергені және мүлікке қасақана залал келтіргені үшін айыпталып отыр.
Тергеу материалдарында Көкірекбаев пен оның орынбасары қызметтік өкілеттігін пайдаланып, кәсіпкермен алдын ала келісіп, атқарылған жұмыстар актілеріне кедергісіз қол қою үшін пара алғаны көрсетілген. Сонымен қатар, кәсіпкер шын мәнінде орындалмаған құрылыс-монтаж жұмыстары бойынша жалған актілерге қол қойылуын ұйымдастырған.
Нәтижесінде мемлекетке келтірілген шығын көлемі шамамен 1,99 миллиард теңгені құрады.
Алқабилердің шешімі бойынша Көкірекбаев пен оның бұрынғы орынбасары кінәлі деп танылды. Сот үкімімен Көкірекбаев 12 жылға бас бостандығынан айырылды. Ал оның бұрынғы орынбасары мен кәсіпкер әрқайсысы 11 жылға сотталды. Оған қоса, үшеуі де өмір бойы мемлекеттік қызметте жұмыс істеу құқығынан айырылды.
Аталған үкім әзірге заңды күшіне енген жоқ.
