Атап айтқанда, «Қабанды» және «Шибут» бөгеттерінің құрылысы кезінде анықталған заңбұзушылықтарға қатысты материалдар қосымша сараптамадан өткізіліп, құқық қорғау органдарына құқықтық баға беру үшін жолданатын болады.
Бақылаудың күшейтілуіне облыстық мәслихат депутаттарының көшпелі мониторингі барысында анықталған бірқатар фактілер себеп болды. Айта кетейік, 2022 жылдан бері салынып жатқан және ауыл шаруашылығы тауарын өндірушілерді суармалы сумен қамтамасыз етуге тиіс бұл стратегиялық маңызы зор нысандардың бүгінде небәрі 73 пайызы ғана дайын.
«Құрылыс-монтаж жұмыстары барысында анықталған кемшіліктер мен мәселелер мерзімнің бұзылуына және құрылыс сапасының төмендеуіне әкеліп соғады. Бұл, өз кезегінде, мемлекеттік қаражаттың тиімді игерілуіне кері әсерін тигізеді», — деді Алматы облыстық мәслихат төрағасы Қуат Байғожаев.
Инспекция барысында депутаттар «Қабанды» бөгетінің құрылыс алаңында мердігер мекеме тарапынан құрылысқа жарамсыз сары топырақ пайдаланылғанын анықтады. Бұған қоса, нысанда бар-жоғы үш адам мен екі техника ғана жұмыс істеп жатқан. Ал «Шибут» бөгетінде тереңдігі 12 метрден асатын резервуардың айналасында қауіпсіздік талаптарына сай қоршау орнатылмаған, бұл жұмысшылар мен тұрғындардың қауіпсіздігіне елеулі қатер төндіреді.
Сонымен қатар қосымша міндеттемелер аясында мердігер ұйым Шалкөде ауылын ауызсумен қамтамасыз ету үшін ұзындығы 2200 метр болатын су құбырын тартуға келісім берді.
Мониторинг барысында жиналған мәліметтер Мемлекеттік сәулет-құрылыс бақылау басқармасына жіберілді. Қазіргі уақытта бұл материалдар сараптамадан өткізіліп жатыр. Сараптама қорытындысы бойынша тиісті материалдар уәкілетті органдарға жолданатын болады.
«Су шаруашылығы инфрақұрылымының құрылысы — ауыл шаруашылығының тұрақтылығы мен еліміздің азық-түлік қауіпсіздігінің кепілі. Сондықтан бұл салада бюджет қаражатының тиімсіз жұмсалуына жол берілмейді. Барлық фактілер жан-жақты зерделеніп, қолданыстағы заңнама аясында тиісті шешімдер қабылданады», — деп атап өтті Алматы облысының әкімі Марат Сұлтанғазиев.
Өңір басшысының тапсырмасына сәйкес, жобалардың жүзеге асырылуына бақылау анықталған заңбұзушылықтар толық жойылғанға дейін жалғасатын болады.
