Жергілікті тұрғындардың сөзінше, мектеп дәретханасы далада орналасқан. Оқу орнының қабырғалары жарылып, сыз тартып, төбесі опырылып жатыр. Ал мектептің бюджетіне 3 млрд теңге бюджет қаражаты жұмсалған.
«Әкімдік бұл мектепті кімге мақтану үшін салды. 1200 орындық таңдаулы, заманауи мектеп деген еді. Ал қазір мектепке оқушы жетіспей отыр. Бастауыш сынып оқушыларын басқа мектептен ата-ананың рұқсатынсыз ауыстыруды ұйғарыпты. Ал заң бойынша баланың қай мектепке баратынын ата-ананың өзі таңдайды емес пе?» — дейді ата-аналар.
Бұл мәселеге қатысты Талғар аудандық әкімдігі кемшіліктерді мердігер компания жаңа оқу жылы басталғанға дейін түзейтінін айтты.
«Тек бірінші қабаттағы қабырғалар жарыла бастаған. Кемшіліктер қайта жөнделеді. Мектеп ішінде ұл-қыздарға бөлек-бөлек дәретханалар бар. Сонымен қатар жоба бойынша аулада да әжетхана салу қарастырылған. Мердігер компания мектептегі кемшіліктерді 25 тамызға дейін түзеуі тиіс», — делінген әкімдік хабарламасында.
