Қоршаған ортаны қорғау, көгалдандыру және экологиялық мәдениетті нығайтуға бағытталған бұл науқан өңір тұрғындарының белсенді қолдауымен жүзеге асып жатыр.
Аудан аумағында «Қарадала орман шаруашылығы» КММ мен Ұйғыр ауданы әкімдігінің бірлескен бастамасымен 10 шақырымға созылған аумаққа 1,2 тонна қараағаш тұқымы егілді. Бұл көлем шамамен 150 қапқа тең. Мамандардың айтуынша, бір тонна тұқымнан мыңдаған жас көшет өсіп, болашақта бұл жер толыққанды орман алқабына айналады.
Экологиялық мәдениетті насихаттау мақсатында «Таза Қазақстан» логотипі бейнеленген аумақ алдағы уақытта демалыс саябағына айналмақ. Жоба өңір экологиясын жақсартуға бағытталған ұзақмерзімді шешімдердің бірі ретінде қарастырылып отыр.
Ұйғыр ауданының әкімі Бота Елеусизованың айтуынша, бұл жоба ағаш отырғызудан бөлек, келер ұрпаққа экологиялық жауапкершілік туралы үлгі көрсету мақсатын да көздейді.
«Экологияны сақтау – әрқайсымыздың азаматтық борышымыз. Табиғатқа бүгін еккен әрбір дән – ертеңге салынған инвестиция. Бұл бастама тек жасыл желекті көбейтіп қоймай, тұрғындардың өмір сапасын арттыруға бағытталған нақты қадам», – деді аудан басшысы.
Айта кетейік, «Таза Қазақстан» тұжырымдамасы аясында аудан көлемінде ағаш отырғызумен қатар, су көздерін тазарту, қоқыс полигондарын жою және экотуризмді дамыту бағытында да бірқатар жұмыстар жүргізілуде.
