Жиынға аудан әкімдерінің орынбасарлары, облыстық басқарма басшылары мен тиісті департамент өкілдері қатысты.
Қатысушылар жарыстың жоспарланған маршрутымен жүріп өтіп, дайындық барысын пысықтады. Шара қорытындысында жұмыс жоспарына сәйкес нақты тапсырмалар жүктелді.
Айта кетейік, «Ұлы дала жорығы» жобасы 2022 жылдан бері жүзеге асырылып келеді. Алғашқы жорық сол жылы елордамыз Астанадан басталып, Түркістан қаласына дейін 1200 шақырымды қамтыған болатын. Жобаның авторы – Бақытжан Тұрлыбеков.
Биылғы жылы «Ұлы дала жорығы» 2025 жылғы 9–14 мамыр аралығында Алматы облысында өтеді. Марафон-бәйге халықаралық деңгейде ұйымдастырылып, Ресей, Қырғызстан, Түркия, Иран, Мажарстан және басқа да елдердің шабандоздары қатысады деп күтілуде. Бәйге жалпы ұзындығы 500 шақырымды құрайды.
Бұл халықаралық дода ұлттық спортты дамытуға және оны әлемдік аренада танытуға бағытталған маңызды қадам болмақ.
