Президенттің айтуынша, бүгінде мектеп түлектерінің 80 пайызға жуығы Ұлттық бірыңғай тестілеуді мемлекеттік тілде тапсырып жатыр. Сонымен қатар, биыл алғаш рет мектеп табалдырығын аттайтын балалардың 70 пайыздан астамы қазақ тілінде білім алатын болады.
«Әр азаматты белгілі бір тілде сөйлеуге мәжбүрлеу – орынсыз. Қазақстанда ешкімді мінберде, күнделікті өмірде «мына тілде сөйле» деп күштеп айтуға болмайды. Тіл мәселесін саяси құралға айналдырып, қоғамда алауыздық туғызуға тырысатын кез келген әрекетке заң аясында қатаң тосқауыл қойылады», – деді Мемлекет басшысы.
Президент бұл ретте шетелде отырып, түрлі ұйымдардың тапсырмасымен ел ішіне іріткі салуға тырысатын деструктивті күштерге де назар аударды. Оның айтуынша, былтыр Ұлттық құрылтай отырысында айтылған бірлік, отаншылдық, тәуелсіздік және келісім – мемлекеттің басты құндылықтары, ал осы қағидаларға қайшы әрекет еткендер заң алдында жауап береді.
«Халқымыздың татулығын бұзуға бағытталған кез келген арандатушылық заңмен жазалануы тиіс. Ал ел бірлігін нығайтуға үлес қосып жүрген азаматтар әрдайым құрметке лайық», – деп түйіндеді Президент.
