Бұл бастама Мемлекет басшысының цифрландыру жөніндегі тапсырмасы аясында жүзеге асырылып, өңір тұрғындары арасында кеңінен қолданыс тапты.
Облыстық Тілдерді дамыту басқармасының мәліметінше, бот құрамында қазақ тілін меңгерудің A1–B2 деңгейлерін қамтитын 100 сағаттық оқу бағдарламасы мен іс жүргізу курстары қарастырылған. Қазіргі таңда жүйеге 3 146 адам тіркелген, олардың 58%-ы шалғай ауыл тұрғындары.
«Басты мақсатымыз – қазақ тілін үйренуді барлық азаматқа, орналасқан жеріне қарамастан, қолжетімді ету. «TilOquBot» шалғайда тұратын тұрғындарға да ыңғайлы әрі тиімді форматта білім алуға мүмкіндік беріп отыр. Бұл – цифрлық трансформация жағдайында ерекше маңызды құрал», – деді басқарма басшысы Данияр Ахметов.
Оның айтуынша, бұл бот – мемлекеттік тіл саясатын іске асыру жолындағы кешенді жұмыстың бір бөлігі. Сонымен қатар облыста Тілдер фестиваліне дайындық басталып кетті.
Ауқымды шара аясында түрлі байқаулар, үздік оқытушылар мен белсенділерді марапаттау, мемлекеттік тілді насихаттайтын креативті жобаларды қолдау жоспарланып отыр.
«Бүгінде тіл – тек дәстүрдің емес, заманауи технологиялар мен жастардың қызығушылық әлемінің де көрінісі. «TilOquBot» – осы заман талабына сай жасалған жоба», – деп түйіндеді Ахметов.
Басқарманың хабарлауынша, қыркүйек айында Ұйғыр ауданында фестивальдің қорытындысы өтіп, алты номинация бойынша жеңімпаздар анықталады. Оларға 300 мыңнан 1,5 миллион теңгеге дейін ақшалай сыйлықтар табысталады.
