Бұл бастамаға қаржылай қолдауды мемлекеттік бюджет емес, осы күресте үлес қосуды мақсат еткен әлеуметтік жауапкершілігі жоғары кәсіпкерлер көрсетіп отыр. Бұл туралы Бас прокуратура мәлімдеді.
Ведомствоның хабарлауынша, 2024 жылдың қаңтар айында 60 грамм мефедронның тәркіленуіне себеп болған ақпарат үшін 300 мың теңге төленген. Ал наурызда 80 грамнан астам синтетикалық есірткі заттарын анықтауға көмектескен мәлімет иесіне 400 мың теңгеден астам сыйақы берілді.
«Сыйақының мөлшері тәркіленген есірткі көлеміне байланысты есептеледі. Жоба алғашқы нақты нәтижелерін көрсетіп отыр. Осылайша мемлекет азаматтардың қылмыспен күрес жолындағы белсенділігі мен ынтымақтастығын қолдайды.
Есірткінің таралуын тоқтатуға өз үлесін қосқан әрбір адам бұл әрекетті ақша үшін емес, өмір үшін, болашақ ұрпақ үшін жасайды.
Балаларымыздың амандығы үшін біріге әрекет етсек, қылмысқа жол қалмайды. Жақсылықты таңдап, қоғам қауіпсіздігіне үлес қосқан әр азаматқа алғысымыз шексіз. Сіздердің қырағылығыңыз – біздің ортақ күшіміз. Барлық аймақтарды осы бастаманы қолдауға шақырамыз. Мемлекет, кәсіпкерлер мен қарапайым халық бірігіп, есірткіге қарсы тұра аламыз», – делінген Бас прокуратура таратқан мәліметте.
Фото: gov.kz
