Тергеу Embraer ERJ 190-100 IGW ұшағының құйрық бөлігі, стабилизатор, сол жақ қозғалтқыш пен қанат, сондай-ақ гидрожүйе бөлігінде тұтастай тесілу сипатындағы (сквозной) зақымдану болғанын көрсетіп отыр.
Тергеушілер ұшақтың кейбір ішкі бөліктерінен металл сынықтары мен басқа да бөгде заттарды тауып, сараптамаға жіберген. Бөгде заттардың ішінде әртүрлі металдан жасалған бөлшектер бар екені анықталды. Әзірге олардың оқ немесе басқа да жарылғыш затқа қатысты болғаны туралы толық ақпарат жоқ.
Алдын ала қорытындыға сәйкес, ұшақтың аса маңызды жүйелері – тангажды басқару мен гидравлика осы ықтимал сыртқы соққы салдарынан істен шыққан.
Соның кесірінен экипаж әуе кемесін қалыпты басқара алмай, оқыс жағдайға тап болған деген болжам жасалды.
Ұшақтан алынған үлгілер қосымша зертханалық талдаудан өткізілуде. Дегенмен, қазіргі негізгі нұсқа – ұшаққа сыртқы әсер жасалғаны.
Тергеу барысы аяқталған соң, мамандар ұшақ апатының түпкі себебін анықтап, ресми шешімін жарияламақшы.
