Олар жол ережесін жүйелі түрде бұзып, айыппұл төлеуден жалтарып жүрген. Қазіргі таңда көліктері айыппұл тұрағына қойылды.
Алматы полициясының алдыңғы шептегі бөлімшелері жол қауіпсіздігін қамтамасыз ету мақсатында іс-шараларын жүргізіп жатыр. Көлік құралдарына жалған мемлекеттік нөмірлік белгілерін орнатқан, сондай-ақ жол қозғалысы ережелерін жүйелі түрде бұзып, айыппұл төлеуден жалтарып жүрген көліктерді анықтауға ерекше назар аударылды. Сонымен қатар, полицейлер құқық бұзушылықты анықтаудың электрондық жүйесі «Сергек» пен «Қорғау – қауіпті жүргізуші» қосымшасы арқылы жол қозғалысы жағдайын бақылауға алды. Ай басталғалы жол қауіпсіздігін сақтамаған 4 342 құқық бұзушылық анықталды және көлікті мас күйінде басқарған 44 жүргізуші ұсталды.
Автоматтандырылған ақпараттық бақылау жүйесінің көмегімен 46 жүргізушінің жалған тіркелген нөмірмен жүргені белгілі болды. Одан бөлек, 220-сы көлік сақтандырусыз, 397-сі техникалық бақылаусыз, 47-сі мемлекеттік нөмірсіз жүрген.
Сонымен қатар, сот шешімімен көлік құралдарын басқару құқығынан айырылса да, көлік жүргізіп жүрген 7 жүргізуші ұсталды. Тәртіп бұзушылар әкімшілік жауапкершілікке тартылып, 62 автокөлік мамандандырылған тұраққа орналастырылды.
