Жиында айтылған талғарлықтардың көкейкесті мәселелері:
- интернет желісінің нашарлығы;
- жөндеу көрмеген жолдар;
- Алматы қаласымен автобус қатынасы;
- бірқатар мектептердің жаңа оқу жылында оқушыларды қабылдауға дайын еместігі;
- баспанаға, жер телімдеріне және жайылым жерлерге кезектің баяу жүруі.
Облыстық баспасөз қызметінің мәліметінше, Талғар тұрғыны Ирина Ким кейбір ауылдық округтерде аз қамтылған отбасыларға заңды жеңілдіктерге (мектеп асханасында баланың тегін тамақтануы, АӘК алу, т.б) қол жеткізудің қиын екенін айтты. Олар мемлекет көмегінен тұрғылықты жері бойынша тіркеуі жоқ болғандықтан да қағылатынын атап өтті.
Талғар белсендісі Галина Арзамасованың айтуынша, бұл мәселені шешудің оңтайлы жолы — тиісті мамандардың АӘК-ті мұқтаж жандарға жеке тәртіппен тағайындауы болмақ. Алайда, бюрократизмнің әсерінен мұндай шара қолданылуы екіталай.
Сондай-ақ, қоғам белсендісі жолаушылар тасымалымен айналысатын мекемелерді субсидияламаудың кері әсері мектеп оқушылары мен зейнеткерлерге тиетіні туралы сөз қозғады.
«Оқушылар он бес жасқа толғаннан кейін қоғамдық көлікте жеңілдікпен жол жүру құқығынан айырылады», — дейді талғарлық белсенді.
Облыс әкімі Марат Сұлтанғазиев тұрғындардың мәселесін түртіп алып, тиісті мамандарға түйіткілдердің түйінін тарқатуға тапсырма берді. Ол жақын арада Талғар ауданына барып, тұрғындар шағымданған бірқатар нысанды тексеретінін айтты.
