Игі шара «аштық және саяси қуғын-сүргін құрбандарына» арналған музейде өтті. Бұл күні қаламгермен жүздесіп, тағлымды әңгімесін тыңдауға Заречныйдағы әскери бөлімнің жас сарбаздары да келді.
«Бүгінгі шараның бұл музейде өтуі де тегін емес. Мен білетін Абайдың немере інісі Шәкәрімнен бастап, 14 ұрпағы қуғын көрген. Ал енді бүгінгі жастар Абай армандағандай білімді, білікті болуы керек қой», — дейді жазушы Болат Жүнісбеков.
«Абайдың ақын ұлдары» еңбегінде дала данышпанының дара талантты ұлдары Ақылбай, Мағауия және Тұрағұл сондай-ақ, немересі Әубәкір Ақылбайұлы жайлы зерттеулер зерделенген. Айта кетсек, тұңғышы Ақылбай мен Мағауия аты әйгілі көркем дастан, поэмалардың авторы. Ал, Тұрағұл қара сөздің хас шебері. Оған қоса, аудармашылығы да бір төбе. Немересі Әубәкірдің өлеңдерінде Абай үлгісі сайрап жатыр. Ол сатиралық өлеңдермен қатар тарихи шығармаларға бет бұрып, көлемді дастандар жазған.
Шара соңында қонақтар музейді аралап көрді. Ел басынан өткен ауыр күндердің ізі іспетті экспонаттармен танысты.
Айта кетсек, Алматы облысында «Абай әндері» атты «Үшқоңыр» фольклорлы-этнографиялық ансамблінің концерті, «Үмбетәлі жырларындағы – Абай бейнесі» атты жиыны, «Хантәңірі» халық театрының «Телғара» фильм-спектаклінің қойылымы, «Абай – жыршы, ұлы ақыны елімнің» атты поэзия кеші сынды шаралар 17 тамызға дейін жалғасын таппақ.
