Парламент Мәжілісінің депутаты, «AMANAT» партиясы фракциясының мүшесі Асхат Аймағамбетов «Болашақ» бағдарламасының аясын кеңейту туралы бастама көтерді, деп хабарлайды alataunews.kz.
«Бағдарламаға енді тек магистратура мен докторантура ғана емес, бакалавриат деңгейінде де гранттар бөлінбек. Бұл гранттарға ең үздік халықаралық олимпиадалар мен ғылыми жобалардың жеңімпаздары үміткер бола алады», – деп мәлімдеді депутат.
Оның айтуынша, бұл қадам «ақылдың шетелге ағуын» тоқтатып, елге білікті мамандарды қайтаруды көздейді. Бағдарлама арқылы Қазақстанның қаражатына білім алған студенттер оқуын аяқтаған соң елге оралып, қызмет етуге міндеттеледі.
«Бүгінде әлемнің жетекші университеттері халықаралық олимпиада жеңімпаздарына өздері грант ұсынып, оларды шақырып алады. Нәтижесінде, жастар сол елдерде қалып қояды. Ал біз бакалавриатқа мүмкіндік беру арқылы дарынды жастарды елге қайтарып, Қазақстан экономикасына қызмет етуге бағыттаймыз», – деді Аймағамбетов.
Бұл бастама елдегі дарынды жастардың мүмкіндіктерін кеңейтіп, оларды шетелдік үздік тәжірибелерді меңгеруге және отандық экономиканы дамытуға үлес қосуға ынталандыруды көздейді.
