Талғар аудандық полициясы жол қозғалысы ережелерін бұзған әрекеттер түсірілген бейнежазбаға қатысты ресми түсініктеме берді, деп хабарлайды alataunews.kz.
Тексеру барысында жол ережелерін бұзған барлық жүргізушілер анықталып, олардың әрекеттері үшін 9 әкімшілік хаттама толтырылды. Айыппұлдар көлік құралдарының қозғалыс бөлігіне дұрыс орналаспауы, қарсы бағытқа шығып кету және басып озу ережелерін сақтамау сияқты бұзушылықтарға қатысты рәсімделді.
Бейнежазбадағы көліктер айыппұл тұрағына қойылды. Сонымен қатар, құқық бұзушылармен болашақта мұндай жағдайлардың алдын алу мақсатында профилактикалық әңгіме жүргізілді.
«Полиция жолдағы тәртіпті сақтауға белсенді үлес қосқаны үшін бейне авторына алғыс білдіреді. Жүргізушілерге, жаяу жүргіншілерге және басқа қозғалыс қатысушыларына жол қозғалысы ережелерін сақтау – қауіпсіздіктің басты кепілі екенін еске саламыз», – делінген хабарламада.
