Қонаев қаласының әкімшілік құқық бұзушылықтар жөніндегі мамандандырылған ауданаралық сотына жыл басынан бері 3800-ден астам іс түсті. Істердің басым бөлігі жол-көлік оқиғаларына қатысты болды, деп хабарлайды alataunews.kz.
Бұл туралы сот төрағасы Әлинасыр Қадыров Өңірлік коммуникациялар қызметінің алаңында өткен баспасөз мәслихатында хабарлады.
Түскен істердің 3570-і қаралып, 2370 іс бойынша жалпы сомасы 322 миллион теңгеге жуық айыппұл салынған. Бұл соманың жартысынан астамы мемлекет қазынасына төленген. Жол-көлік оқиғаларына байланысты 1619 іс тіркеліп, нәтижесінде 1561 адамға айыппұл салынған, ал 18 азамат көлік жүргізу құқығынан айырылған.
Сонымен қатар, отбасылық-тұрмыстық қатынастар бойынша 540 іс қаралып, 206 адам әкімшілік жауапкершілікке тартылды. Ұсақ бұзақылық пен вандализмге қатысты істерде де әкімшілік жазалар қатаңдатылғаны атап өтілді.
“Қоғамдық тәртіпті сақтау – біздің басты міндетіміз. Қолданылып жатқан шаралар құқық бұзушылықтардың алдын алуға және заң үстемдігін нығайтуға бағытталған”, – деді Әлинасыр Қадыров.
Брифингте сот төрағасы құқықтық саладағы жаңалықтар мен Әкімшілік құқық бұзушылық туралы кодекске енгізілген өзгерістер туралы да түсіндірді.
