Алматы облысының басты автомагистральдарында 11 заманауи «Сұңқар» аппараттық-бағдарламалық кешені іске қосылды, деп хабарлайды alataunews.kz.
«Бұл жоғары технологиялық жүйелер Алматы-Көкпек-Көктал, Алматы-Шелек-Қорғас және Алматы-Өскемен жолдарында орнатылған. «Сұңқар» кешендері жол жағдайын тәулік бойы бақылауға арналған. Олар жылдамдықты асыруды, жол қозғалысы ережелерін бұзуды және жүргізушілердің басқа да қауіпті әрекеттерін тіркейді. Жүйені енгізудің басты мақсаты – апат санын азайту, көлік жүргізу мәдениетін көтеру және жол қауіпсіздігін қамтамасыз ету», – деп мәлімдеді облыстық әкімшілік полиция басқармасының бастығы Еркебұлан Ахметов.
Жүйе жоғары ажыратымдылықтағы камералар мен арнайы бағдарламалық құралдардың көмегімен бұзушылықтарды автоматты түрде анықтайды. Тіркелген мәліметтер бірыңғай деректер базасына жіберіледі, онда олар өңделіп, жүргізушілерді жауапкершілікке тартуға негіз болады.
«Жол қауіпсіздігін қамтамасыз ету – біздің негізгі басымдығымыз. «Сұңқар» секілді технологиялар қозғалыс қатысушыларының өмірі мен денсаулығын қорғап, тиімді әрі жедел әрекет етуге мүмкіндік береді», – деп толықтырды Еркебұлан Ахметов.
