Астанада Ұжымдық қауіпсіздік туралы шарт ұйымының (ҰҚШҰ) Қауіпсіздік кеңесінің отырысы басталды. Отырысқа мүше мемлекеттердің басшылары, сыртқы істер және қорғаныс министрлері, қауіпсіздік кеңестері хатшылары мен парламент өкілдері қатысты, деп хабарлайды alataunews.kz.
Қазақстан президенті Қасым-Жомарт Тоқаев отырысты ашып, Қазақстанның төрағалық ету кезеңінде ҰҚШҰ-ның алдында тұрған барлық міндеттері толық орындалғанын атап өтті.
«Ұжымдық қауіпсіздік мәселелері Сыртқы істер және Қорғаныс министрлерімен нақты талқыланды, сондай-ақ Қауіпсіздік кеңесі хатшылары мен парламент басшылары деңгейінде кездесулер өтті, ұйымның қосымша және жұмыс органдарының жиналыстары өткізілді. Қызметтің түрлі бағыттары бойынша бірқатар консультациялар жүргізілді. Сессияаралық кезеңде халықаралық ынтымақтастық, қорғаныс саласындағы өзара іс-қимыл, сондай-ақ ұжымдық қауіпсіздікке төнетін заманауи қауіп-қатерлерге қарсы іс-қимыл мәселелерін қамтитын маңызды құжаттар қабылданды», — деп атап өтті Тоқаев.
Сонымен қатар, Ұлы Отан соғысындағы Жеңістің 80 жылдығына дайындық жұмыстары ерекше назарға алынған. Тоқаев ҰҚШҰ елдерінің басшыларының ортақ басымдықтары мен жемісті ынтымақтастығы үшін әріптестеріне алғысын білдірді.
«Ұлы Отан соғысындағы Жеңістің сексен жылдығына дайындыққа ерекше көңіл бөлінді. Бүгін Ұжымдық қауіпсіздік туралы шарт ұйымының Қауіпсіздік кеңесінің сәйкес мәлімдемесі біздің назарыңызға ұсынылады. Жалпы, Қазақстан Республикасының төрағалық ету кезеңінде ҰҚШҰ-ға жүктелген барлық міндеттер орындалды», — деді Мемлекет басшысы.
