Сенат депутаты Айнұр Арғынбекова денсаулық сақтау саласында кадр тапшылығының әлі күнге дейін күрделі мәселе екенін мәлімдеді, деп хабарлайды alataunews.kz.
Депутаттың айтуынша, бұл мәселе тек ауылдық жерлерде ғана емес, елорда мен облыс орталықтарында да байқалады.
«Бүгінгі таңда денсаулық сақтау саласына орасан зор қаржы бөлінгенімен, халықтың толық сұранысын қамтамасыз ету мүмкін болмай отыр. Материалдық-техникалық базасы жеткілікті медициналық ұйымдардың өзінде, «бәрін кадр шешеді» деген сөз әлі де өзекті болып қала береді,» – деді Арғынбекова.
Денсаулық сақтау министрлігінің деректеріне сәйкес, 2023 жылдың соңында Қазақстанда 4 864 дәрігер жетіспейтіні анықталды. Әсіресе Астана, Алматы және Шымкент қалаларында дәрігер тапшылығы айқын сезіледі. Бұдан бөлек, ауылдық жерлер мен аудандарда да маман жетіспеушілігі өзекті.
Сұранысқа ие мамандықтардың қатарына терапевтер, анестезиологтар және акушер-гинекологтар кіреді.
Сенатор Денсаулық сақтау министрлігіне кадр тапшылығын шешуге бағытталған нақты ұсыныстарын жеткізді. Ол келесі шараларды жедел қолға алуды ұсынды:
- «Халық денсаулығы және денсаулық сақтау жүйесі туралы» кодексіне өзгерістер енгізу бойынша заңнамалық акт жобасын Парламентке жылдам енгізу;
- Денсаулық сақтау жүйесінде тиімді кадр саясатын қамтамасыз ету үшін арнайы жол картасын әзірлеп, бекіту;
- Көпсалалы университет клиникаларын құру бойынша жұмысты аяқтау.
Бұл ұсыныстар денсаулық сақтау саласында кадр тапшылығы мәселесін азайтуға және халықтың медициналық көмекке қолжетімділігін арттыруға бағытталған.
