Қазақстан Ішкі істер министрлігі құқық тәртібін сақтау және заң бұзушылықтар үшін жазаның бұлтартпастығын қамтамасыз ету мақсатында шараларды күшейтті. Осыған орай, ведомство 2024 жылдың 28 қарашасында азаматтарға арнайы үндеу жолдады, деп хабарлайды alataunews.kz.
Ішкі істер министрлігінің ресми өкілі Шыңғыс Әлекешевтің айтуынша, ведомство заңдылықты қамтамасыз ету бойынша жаңа технологияларды белсенді түрде енгізуде.
«ІІМ Өзіндік қауіпсіздік департаменті жедел басқару орталықтары мен патрульдік қызметтің жұмысын тәулік бойы бақылауда. Қызметкерлер смарт-жетондармен жабдықталған, бұл құрылғылар олардың әрекеттерін толықтай тіркеп, талаптардан ауытқуға мүмкіндік бермейді,» – деді Әлекешев.
Сондай-ақ, жасанды интеллектпен біріктірілген бейнебақылау жүйелері кез келген заң бұзушылықтарды анықтап, оларға жедел әрекет етуге көмектеседі.
Ведомство өкілі полицияның басты мақсаты – заңды бұзған кез келген адамды, оның мәртебесі мен лауазымына қарамастан, жауапкершілікке тарту екенін ерекше атап өтті.
«Полиция қызметкерлерінің жұмысы заң талаптарын қатаң сақтауға негізделген. Қызметкерлер тарапынан кез келген заңсыз әрекеттер үшін тиісті жауапкершілік қарастырылған. Біз азаматтарды заңға бағынуға, полицейлердің заңды талаптарын орындауға және парақорлықтан аулақ болуға шақырамыз,» – деп қосты Әлекешев.
ІІМ және Сыбайлас жемқорлыққа қарсы қызмет арасында меморандумға қол қойылды. Бұл келісім жемқорлыққа қарсы шараларды одан әрі нығайтуға бағытталған.
«Егер сіз полиция қызметкерлерінің әдепсіз әрекеттерінің куәсі болсаңыз, дереу ІІМ Өзіндік қауіпсіздік департаментіне немесе 1402 сенім телефонына хабарласыңыз. Тек бірлесе әрекет ете отырып, біз қоғамда қауіпсіздік пен әділеттікті қамтамасыз ете аламыз,» – деді Шыңғыс Әлекешев.
Бұл бастамалар ІІМ жұмысының ашықтығын арттырып, азаматтардың құқықтық тәртіпке деген сенімін нығайтуға бағытталған.
