Алматы облысында полиция жолдың жүріс бөлігінде көкпар ойынын ұйымдастырған азаматтарды анықтап, жауапкершілікке тартты, деп хабарлайды alataunews.kz.
Әлеуметтік желіге жүргізілген мониторинг нәтижесінде Еңбекшіқазақ ауданының жолдарында шабандоздардың жол қозғалысы ережелерін өрескел бұзғаны белгілі болды. Құқық бұзушылар аудандық полиция бөліміне жеткізіліп, әкімшілік жауапкершілікке тартылды.
Сот шешімі бойынша:
- Ат спорты ойындарын ұйымдастырушы 7 тәулікке әкімшілік қамауға алынды.
- Төрт қатысушы 5 тәулікке қамауға алынса, қалғандарына айыппұл салынды.
Полиция қызметкерлері әлеуметтік желілерде құқық бұзушылықтарды анықтау және олардың алдын алу жұмыстарын тұрақты түрде жүргізіп келеді.
Тәртіп сақшылары жол қозғалысының барлық қатысушыларын қауіпсіздік және қоғамдық тәртіп ережелерін сақтауға шақырады.
