Марат Сұлтанғазиев Алматы облысының өзі туып-өскен өңір екенін атап өтіп, төрт жыл бұрын сенім білдіріп, облысты басқаруға мүмкіндік берген Мемлекет басшысы Қасым-Жомарт Тоқаевқа алғыс білдірді.
«Президент бастамаларын жүзеге асырып, халықтың ойынан шығу үшін бар білімім мен тәжірибемді жұмсадым», – деп жазды ол.
Экс-әкім өз жазбасында облыстың соңғы төрт жылдағы әлеуметтік-экономикалық даму нәтижелеріне тоқталды.
Оның айтуынша, өнеркәсіп өндірісінің көлемі 1,66 триллион теңгеге жетіп, өңірге 664,8 миллиард теңге инвестиция тартылған. Құрылыс саласы 12,3 пайызға өсіп, 910 мың шаршы метрге жуық тұрғын үй пайдалануға берілген.
Сонымен қатар облыста 11 мыңнан астам тұрақты жаңа жұмыс орны құрылған.
Сұлтанғазиев төрт жыл ішінде өңірде 98 ірі инвестициялық жоба жүзеге асырылғанын атап өтті. Ал Алматы облысына келген туристер саны 2022 жылмен салыстырғанда екі есеге артқан.
75 білім ошағы салынды
Ол әлеуметтік инфрақұрылымды дамыту бағытында атқарылған жұмыстарға да тоқталды.
Оның сөзінше, 2022–2026 жылдар аралығында Алматы облысында 75 білім ошағы салынған. Нәтижесінде үш ауысымда білім беретін мектептердің саны 52-ден 23-ке дейін қысқарған.
Бұдан бөлек, өңірде жаңа емханалар, спорт кешендері және басқа да әлеуметтік нысандар бой көтерді.
Марат Сұлтанғазиев бұл нәтижелердің артында облыстың дамуына үлес қосқан азаматтар мен мемлекеттік қызметшілердің еңбегі тұрғанын айтты.
«Бұл көрсеткіштердің артында тынбай еңбек еткен әріптестерімнің, өңірдің дамуына өз үлесін қосқан әрбір азаматтың ерен еңбегі жатыр. Сол себепті маған қолдау білдірген, сенім артқан, сындарлы сын айтқан және өңірді дамытуға белсенді қатысқан әрқайсыңызға ерекше алғысымды білдіремін», – деді ол.
«Жүрегімде мәңгі қалатын мекенге айналды»
Сұлтанғазиев жазбасында Алматы облысының өзі үшін ерекше маңызға ие екенін жеткізді.
«Осы төрт жыл ішінде Алматы облысы мен үшін туып-өскен топырақ, жай ғана өзім басқарған өңір емес, ақпейіл халқымен, қабылданған шешімдерімен, жеңістерімен және қиын сәттерімен жүрегімде мәңгі қалатын мекенге айналды», – деп жазды ол.
Сөз соңында ол Алматы облысының одан әрі дамуына тілектестік білдіріп, жаңадан тағайындалған өңір басшысы Шыңғыс Әріновке сәттілік тіледі.
«Алматы облысы одан әрі дами берсін. Халқымыз аман болсын! Жаңадан тағайындалған облыс әкімі Шыңғыс Сайранұлы Әріновтің жауапты қызметіне сәттілік тілеймін!» – деп түйіндеді Марат Сұлтанғазиев.
Марат Сұлтанғазиев Алматы облысын 2022 жылғы маусымнан бері басқарды. 4 қыркүйекте Мемлекет басшысының Жарлығымен ол Алматы облысының әкімі лауазымынан босатылып, өңірдің жаңа әкімі болып Шыңғыс Әрінов тағайындалды.
