Депутаттармен кездесу барысында ол Ұлытауда жалпыұлттық Құрылтайдың өтіп жатқанына тоқталып, оның құрамындағы облыс өкілдеріне сенім артатынын айтты. Осы орайда, облыстың әлеуметтік-экономикалық дамуы бойынша алдағы жоспарларға ерекше назар аударды.
Бейбіт Исабаевтың пайымдауынша, азаматтардың өмір сүру сапасын арттыру, жаңа жұмыс орындарын ашу, агроөнеркәсіптік кешенді қолдау, инвестициялар тарту проблемалары бірінші кезекте шешілуі тиіс. Сонымен қатар, ол құрылыс, газ салалары мен инфрақұрылымды дамыту аса қажет екенін айтты.
Депутаттар қант қызылшасы алқаптарын кеңейту, ирригациялық желілерді салу, қант зауыттарының жұмысын қалпына келтіру және облыстың ауылшаруашылығы тауар өндірушілерін қолдау мәселелерін өзекті деп атады. Олардың айтуынша, жастарды жұмыспен қамтуда көптеген проблемалар бар, туризм белсенді дамымай отыр.
Кездесуді қорытындылай келе, Бейбіт Исабаев барлық айтылған мәселелерді сапалы шешу депутаттық корпус тарапынан белсенді қатысуды және қолдауды талап ететінін атап өтті.
