Жазда сел қауіпті кезеңі басталады. Осыған байланысты ҚР ТЖМ «Қазселденқорғау» мамандары алдын алу жұмыстарына кірісті.
Атап айтқанда, мореналық көлдерде, көл бөгеттеріндегі эвакуациялық арналарды босату, тазарту және тереңдету жүргізілетін болады.
Қазіргі таңда МИ-8 тікұшағымен Жетісу Алатауы тауларында орналасқан мореналық көлдердің су көлемін, ұзындығын, енін, тереңдігін және басқа да параметрлерін анықтау үшін батиметриялық түсірілімдер жасалып жатыр.
Жалпы, Жетісу Алатауында 400-ден астам мореналық көлдер бар. Су көлемі жағынан үлкендері — Қорғас, Өсек, Сарқан, Ақсу, Қора, Бүйен, Лепсі, Басқан өзендерінен жиналған көлдер.
2022 жылы Өсек өзені бассейніндегі №4, Қорғас өзені бассейніндегі №2 «Қақпан», Сарқан өзені бассейніндегі «Ақкөл», Ақсу өзені бассейніндегі №59 мореналық көлдерде алдын алу жұмыстарын жүргізу жоспарланған.
