Министрліктің ресми өкілінің мәліметінше, жаңарту жұмыстары кезең-кезеңімен жүзеге асырылады.
«2026 жылы ҰБТ форматына ешқандай өзгеріс енгізілмейді. Бұл оқушылар мен ата-аналарға алдын ала дайындық жүргізуге және емтиханға қалыпты форматта әзірленуге мүмкіндік береді,» – деп атап өтті ол.
ҰБТ-ны халықаралық деңгейге көтеру мәселесі Қазақстан Президенті Қасым-Жомарт Тоқаевтың Нью-Йоркте Educational Testing Service (ETS) компаниясы басшылығымен өткен кездесуінде талқыланған. Әлемдегі ең ірі тестология және тест әзірлеу орталықтарының бірі саналатын ETS ҰБТ сұрақтарының сапасын арттыруға және әдістемесін жетілдіруге атсалыспақ.
Ғылым және жоғары білім министрі Саясат Нұрбектің айтуынша, бұл бағытта ауқымды жұмыс жүргізіледі.
«Сексен жылдық тарихы бар, әлемдегі ең ірі тестология орталығы – ETS компаниясымен келіссөздер өтті. Ұлттық бірыңғай тестілеудің сапасын түбегейлі арттыру үшін олардың тәжірибесіне сүйенеміз. Келесі айда ETS мамандарынан құралған зерттеушілер делегациясы Қазақстанға келіп, бірлескен жұмысты бастайды. Бұл процесті жүйелі түрде жүргіземіз», – деді министр.
Жоба толық іске асқан жағдайда ҰБТ халықаралық талаптарға сай келіп, қазақстандық түлектердің білімі әлемдік деңгейде бағаланатын болады.
