Қазақстан құрамасы D тобындағы соңғы матчын Дэвис кубогының он дүркін чемпионы Ұлыбританиямен өткізіп, 1:2 есебімен жеңіліс тапты.
Қазақстандық Дмитрий Попко «Үлкен дулыға» турнирінің үш дүркін чемпионы, екі мәрте Олимпиада жеңімпазы Энди Маррейге 4:6, 3:6 есебімен есе жіберсе, Александр Бублик Кэмерон Норриді ұтты – 6:4, 6:3.
Жұптық бәсекеде Александр Недовесов пен Александр Бублик әлемнің бірінші және үшінші ракеткалары Джо Солсбери мен Нил Скупскиге қатты қарсылық көрсетті. Үш сет те тай-брейкпен аяқталып, соңғы сәтте ұлыбританиялықтар жеңісті жұлып алды – 6:7, 7:6, 6:7.
Топтық бәсеке барысында Бублик пен Недовесов әлемнің жұптық сындағы көшбасшылары, нидерландылықтар Колхоф (4 ATP) пен Мидделкопты, сондай-ақ америкалықтар Рам (2 АТР) мен Сокты жеңді.
D тобынан Нидерланд пен АҚШ құрамалары ширек финалға шықты. Енді қазақстандық теннисшілер алдағы жылдың ақпанында келесі командалық әлем чемпионатының жолдамасы үшін таласады. Жеребе қараша айының аяғында тартылады.
