«Баладан да, үйден де айырылған адаммын. Әкімдік тендер ойнатылса, үйің бар, тендер ойнатылмаса үйің жоқ. Өзің үй тауып кел деп отыр. Төрт-бес үй таптым. Бірақ ешқайсысы конкурсқа қатысқысы келмеді. Өйткені, қалталарынан 50 мың теңге төлейді», – деді Гүлнар Тілеухан.
Бұған дейін Алматы облысының экс-әкімі Қанат Бозымбаев көшкін кезінде көз жұмған қыздың отбасына көңіл айтып, зардап шеккендерге қолдау көрсетуге уәде берген болатын.
Ал Текелі қаласының тұрғын үй-коммуналдық шаруашылығы бөлімінің мәліметінше, көшкіннен зардап шеккен отбасы үшін тұрғын үй сатып алуға конкурс жарияланған. Конкурстың аяқталуына үш-төрт күн қалды.
«Қазіргі уақытта зардап шеккен отбасылар уақытша жалға берілетін тұрғын үймен қамтамасыз етілді. 200 АЕК мөлшерінде біржолғы әлеуметтік көмек төленді. Сондай-ақ, қала кәсіпкерлері, волонтерлері, «Қызыл Ай» қоғамы жалпы сомасы 1 млн 715 мың 400 теңгеге қайырымдылық көмек көрсетті», – делінген Текелі қаласының хабарламасында.
Еске салсақ, 15 мамыр күні сағат 12:00-де Текелі қаласында топырақтың артық ылғалдануынан тау баурайының етегінде орналасқан тұрғын үйлер лай көшкінінен зардап шекті. Көшкін кезінде зақым келген үйлердің бірінде бес жасар қыз көз жұмды.
