Денсаулық сақтау министрі Ажар Ғиният өз баяндамасында әлемде коронавирус инфекциясына шалдыққандар санының өсуі жалғасып жатқанын және зерттелген үлгілердің 95%-ы оның «Омикрон» штаммы екенін көрсеткенін атап өтті.
20 маусымнан бастап елімізде КВИ-мен сырқаттану арта бастады. Соңғы екі аптада ауырған адамдар саны 3,2 есе өсті. (10 714-тен 34 550 жағдайға дейін).
Министрдің айтуынша, ауырған адамдардың 80%-ы екпе алмағандар немесе 6 ай бұрын егілгендер екенін ескерсек, бұл КВИ қарсы ревакцинацияны уақытылы алу керегін көрсетеді. Бүгінгі күні ревакцинацияны 5 млн астам адам алды, бұл тиісті контингенттің 68%-ын құрайды.
Премьер-Министр жалпы коронавирус инфекциясын жұқтырудың көбейгені, бұл әсіресе Нұр-Сұлтан қалпсы мен Қарағанды облысында байқалып отырғанын атап өтті.
Үкімет басшысы денсаулық сақтау министрлігі эпидемиологиялық жағдайға тұрақты мониторинг жүргізіп, шектеу шараларының сақталуын қамтамасыз етуі тиіс екенін айтты.
«Маска тағу, әлеуметтік қашықтықты сақтау сияқты алдын алудың негізгі шаралары қатаң сақталуы керек. Вакцинациялау мен ревакцинациялаудың төмен қарқыны эпидемиологиялық жағдайдың күрт нашарлап кетуіне алып келеді», – деп түйіндеді Премьер-Министр.
Сондай-ақ, Смайылов әкімдіктерге халықты вакцинациялау және ревакцинациялау жұмыстарын жандандыруды тапсырды.
