Бір тәулікте айлық жауын-шашын мөлшері түскен Словенияда қатты су тасқыны болып жатыр. Төтенше жағдай елдің жаңа тарихындағы ең үлкен табиғи апат деп танылды, деп хабарлайды alataunews.kz Euronews-ке сілтеме жасап.
Толассыз жауған нөсерден болған су тасқынынан кем дегенде 4 адам қаза тапты. Залал көлемі 500 млн еуроға бағаланып отыр.
Еуропаның оңтүстігіндегі елде бір тәулікте айлық жауын-шашын мөлшері жауған. Елдің үштен екі бөлігі табиғи апаттан зардап шекті. Көптеген ғимаратты су басып, ондаған мың үй жарықсыз қалды.
Словения премьер-министрі Роберт Голобтың айтуынша, «зақым көлемі ауқымды, себебі Словенияның үштен екі бөлігі зардап шекті. Қалыпты өмірге қайта оралу үшін көп күш керек».
Мыңдаған адамды эвакуацияға мәжбүр болды, тұрғындарды тікұшақтар, жедел қызмет мамандары қайықтың көмегімен құтқарды.
Еуропалық комиссия төрағасы Урсула фон дер Ляйен Словенияға ЕО тарапынан көмектесуге уәде берді. Словения үкіметі НАТО-ға көмек сұрап жүгінді: әскери тікұшақтар мен жиналмалы көпірлер жіберуді өтінді.
