Өңірлік коммуникациялар қызметі хабарлағандай, қазіргі уақытта 11 кандидат ұсынылды.
«Ұсынылғандардың ішінде: 1 – аудан әкімі, 3 – мемлекеттік қызметшілер, 2 – коммерциялық құрылымдардың қызметкерлері, 4 – бюджеттік ұйымдардың қызметкерлері, 1 – қоғамдық бірлестіктің қызметкері. Үміткерлердің ең жасы –1991 жылы туған (31 жас), ең үлкені – 1963 жылы туған (59 жас). 8 адам (72,7%) «Аманат» партиясының мүшесі, 1 адам «Ауыл» (9%), 2 адам (18,2%) партияның мүшелігін көрсетпеді. Ұлты бойынша: 9 (81,8%) – қазақтар, 2 (18,2%) – орыстар», — деп хабарлады облыстық сайлау комиссиясының мүшесі Қахарман Еркінайұлы.
6 кандидат тіркелді, қалғандарының қажетті қол қою парақтары, сайлау жарнасы, активтер мен міндеттемелер туралы декларация сынды құжаттары ұсынылмады.
11 шілдеде Мемлекет басшысының Жарлығымен 24 тамызға Парламент Сенаты депутаттарын сайлау белгіленді. Сенатқа 2 депутат сайланатын болады: 2017 жылғы 28 маусымда сайланған депутаттардың өкілеттік мерзіміне (1 жылға), 2020 жылғы 12 тамызда сайланған депутаттардың өкілеттік мерзіміне (4 жылға).
Қазақстан Республикасының тұрғылықты азаматы және оның аумағында соңғы он жыл бойы тұрақты тұрып жатқан адам Парламент депутаты бола алады. Жасы отызға толған, жоғары білімі және кемінде бес жыл жұмыс өтілі бар, тиісті облыстың аумағында кемінде үш жыл тұрақты тұратын адам Сенат депутаты бола алады. Сотты болған, сот әрекетке қабілетсіз деп таныған адам депутаттыққа кандидат бола алмайды.
3 тамыз күні сағат 18:00-де кандидаттарды тіркеу аяқталып, тіркелген кандидаттар үгіт-насихат жұмыстарына кіріседі.
Сенат депутатын сайлау бойынша дауыс беру таңдаушылардың мәслихаттар депутаттарының бірлескен отырысында өткізілетін болады.
Дауыс беруге қатысқан таңдаушылардың елу проценттен астамының дауысын алған кандидат сайланды деп есептеледі.
