Байқауға Батыс және Түркістан облысы, Алматы, Жетісу, Абай облыстарынан 14 күйші қатысты. Аталған шара екі кезең бойынша өрбіді. Бірінші кезеңде күйшілер төрт туынды орындаса, ақтық сынға шыққандар да төрт күйден төкпелетті.
Байқауда қазақ өнерінің парқын білетін Жанғали Жүзбай, Төлепберген Тоғжанов, Мұрат Әбуғазы, Талғат Оразаев сынды дәулескер күйшілер қазылық етті. Жүзден тұлпар шыққан шарада бас жүлдені жамбылдық Мейірбек Әзімбаев жеңіп алды.
«Мен екінші кезеңге өтетінімді білдім. Өйткені ұзақ уақыт тыңғылықты дайындалдым. Негізі мұндай шара төл өнерімізге деген үлкен демеу. Әсіресе, жас күйшілерге дем береді. Әлі де жалғасын тапса деймін. Себебі, ұялы телефоннан бас алмайтын жастарға кеңінен насихатталар еді», — дейді Мейірбек Әзімбаев.
Республикалық байқауда бірінші орын қасиетті Жамбыл жерінің тумасы Тимур Үмбетжанға бұйырды. 2-орынды жетісулық Мұхит Мүкен, ал 3-орынды Алматы қаласынан келген Лунара Мәуетбек жеңіп алды.
