Есік қаласындағы №123 сайлау учаскесінде дауыс беру кезінде тұрғындардың назарын ерекше қатысушы аударды. Қала тұрғыны Қазақстан тарихы мен мәдениетінің маңызды символдарының бірі саналатын «Алтын адам» бейнесіндегі костюммен келіп, көпшіліктің қызығушылығын тудырды.
Ерекше киімдегі азамат учаскеге келгендерге көтеріңкі көңіл күй сыйлап, жиналғандар оның жанында суретке түсіп жатты.
Акцияға қатысушының айтуынша, бұл бастама елдің болашағына бейжай қарамай, азаматтық белсенділік танытуға үндейді.
«Мен ең дұрыс жолды таңдадым – өз елімнің болашағына бейжай қарамай, оның дамуына белсенді қатысу. Менің ата-бабаларым да кезінде маңызды шешімдер қабылдаған, мен олардың аманатына адал болуға тырысамын. Бүгін дәл “Алтын адам” бейнесін таңдағаным да кездейсоқ емес. Бұл бейне халқымыздың тарихын айшықтап, жерлестерімнің бойында мақтаныш сезімін оятып, ұлттық рухты нығайтады», – деді ол.
Бақылаушылардың айтуынша, мұндай бастамалар дауыс беру үдерісіне ерекше атмосфера сыйлап, тұрғындардың азаматтық жауапкершілігінің жоғары екенін көрсетеді. Көпшілік үшін референдумға қатысу тек маңызды қоғамдық-саяси оқиға ғана емес, сонымен қатар ұлттық дәстүрлер мен мәдени мұраға деген құрметтің бір көрінісіне айналып отыр.
