Сапар барысында ол алдымен «Көшпенділер қалашығына» барып, туристер санының артуына байланысты қауіпсіздік шараларын күшейтуді тапсырды. Атап айтқанда, санитарлық-эпидемиологиялық талаптарды сақтау, сондай-ақ тұрақты полиция және медициналық пункттер орналастыру қажеттігі айтылды.
Бұдан кейін әкімнің бірінші орынбасары солтүстік жағалауда болып, жедел-құтқару жасағының жұмысымен танысты. Мамандардың мәліметінше, бөлімшенің материалдық-техникалық базасы жаңартылған. Құтқарушылар заманауи дрондармен, су көліктерімен және сүңгуір жабдықтарымен қамтамасыз етілген. Сонымен қатар қосымша гидроскутерлер сатып алу мәселесі қарастырылып жатыр.
Сапар аясында солтүстік жағалаудағы коммуналдық жағажайды жаңғырту жобасы да таныстырылды. Нәтижесінде жауапты мамандарға қысқа мерзімде құрылыс-монтаж жұмыстарына кірісу тапсырылды.
Сондай-ақ Қанат Есболатов №6 және №7 жағажайларда жүргізіліп жатқан құрылыс жұмыстарымен танысты. Жоба аясында көше жарығын жаңарту, бейнебақылау жүйелерін орнату, қоқыс жәшіктері, балалар және спорт алаңдарын салу, санитарлық тораптар мен шағын бизнес нысандарын орналастыру көзделген.
Бұдан бөлек, демалушылар үшін көлеңкелі шатырлар орнатылып, инженерлік инфрақұрылым толық жаңғыртылады.
