Көктемнің шуақты мерекесіне орай ұйымдастырылған шарада Алматы облысының әкімі Марат Сұлтанғазиев өңірдің әлеуметтік-экономикалық дамуына үлес қосып жүрген әйелдерді 8 наурыз мерекесімен құттықтады.
Мерекелік кештің ашылуында ана мейірімі мен өмірлік даналығын дәріптеген сахналық қойылым ұсынылды. Қойылымда жасы ұлғайса да өмірге деген сенімі мен қайсарлығы мұқалмаған қарт ананың бейнесі көрермендерге ерекше әсер қалдырып, көпшіліктің көңілін толқытты.
Аймақ басшысы өз құттықтау сөзінде елімізде гендерлік теңдікті нығайту, аналар мен балаларды қорғау, әйелдердің кәсіпкерлікке және қоғамдық-саяси өмірге белсенді араласуына жағдай жасау мемлекеттік саясаттың басым бағыттарының бірі екенін атап өтті. Бұл бағытта мемлекет тарапынан жүйелі қолдау көрсетіліп келеді.
Облыс әкімінің айтуынша, Алматы облысында әйелдердің қоғамдық өмірдегі белсенділігі жылдан жылға артып келеді. Бүгінде өңірдегі басқару саласында әйелдердің үлесі 27 пайызды құраса, мемлекеттік қызметтегі қыз-келіншектердің үлесі 48 пайызға жеткен. Бұл – нәзікжандылардың қоғам өміріндегі рөлінің артып келе жатқанын көрсетеді.
Сондай-ақ облыста 58 мыңнан астам көпбалалы ана бар. Оның ішінде 19 мыңнан астамы «Алтын алқа» және «Күміс алқа» иегерлері. Өңір басшысы аналардың ұрпақ тәрбиесіндегі ерекше рөлін атап өтіп, олардың еңбегі әрдайым құрметке лайық екенін жеткізді.
Салтанатты шара барысында облыстың әлеуметтік-экономикалық дамуына қосқан үлесі үшін бірқатар әйел азаматтар мемлекеттік наградалармен марапатталды. Атап айтқанда, еңбек ардагері Роза Исатаева мен облыс әкімі аппараты басшысының орынбасары Зәуре Құсайынова «Құрмет» орденімен наградталды. Ал Қарасай аудандық білім бөлімінің басшысы Әсел Еркімбаева мен жеке кәсіпкер Махинур Таипова «Ерен еңбегі үшін» медаліне ие болды. Бұдан бөлек, түрлі салада еңбек етіп жүрген бірқатар әйелдерге облыс әкімінің Құрмет грамотасы табысталды.
Мерекелік кеш концерттік бағдарламаға ұласып, танымал эстрада жұлдыздары мен Сүйінбай атындағы облыстық филармонияның өнерпаздары сахнаға шықты. Өнерпаздар мерекелік кешке жиналған аруларға көтеріңкі көңіл-күй сыйлады.
