Қазіргі таңда құрылыс алаңында жер қазу және аумақты дайындау жұмыстары жүргізілуде. Қонаев қаласының әкімі Асхат Бердіханов құрылыс басына барып, жобаның жүзеге асырылу барысымен танысты. Сондай-ақ инвесторлармен кездесіп, жаңа білім беру нысанының уақытылы пайдалануға берілуіне қатысты мәселелерді талқылады. Кездесу барысында инженерлік-коммуникациялық желілерді тарту, құрылыс жұмыстарын ұйымдастыру, мемлекеттік қолдау және тараптардың өзара ынтымақтастығы сөз болды.
Қонаев қаласында саяжай алқаптары тұрғындарының балалары үшін мектеп мәселесі өзекті болып отыр. Қазіргі уақытта осы аумақтарда тұратын 1200-ге жуық оқушы күн сайын білім алу үшін қаладағы мектептерге қатынауға мәжбүр. Жаңа білім беру мекемесінің салынуы аталған мәселені шешуге бағытталған. Мектеп пайдалануға берілгеннен кейін саяжай тұрғындарының балалары үшін білім алу мүмкіндігі кеңейіп, қаладағы қолданыстағы мектептерге түсетін жүктеме азаяды деп күтілуде.
Қала әкімі Асхат Бердіхановтың айтуынша, құрылыс жұмыстары облыс басшылығының тапсырмасымен қолға алынған.
«Бұл нысанның құрылысы Алматы облысының әкімі Шыңғыс Әріновтің тапсырмасымен басталды. Құрылыс жұмыстарын бір жыл ішінде аяқтау жоспарланып отыр», – деді қала әкімі.
Жобаны «NEW Construction LTD» ЖШС жеке инвестиция есебінен жүзеге асырып жатыр. Жоба жетекшісі Денис Брюхановтың мәліметінше, білім беру нысанына 2 гектар жер телімі бөлінген. Мектеп ғимаратының жалпы ауданы 10 мың шаршы метрді құрайды. Жаңа білім ордасы 900 оқушыға есептелген. Құрылыс аяқталғаннан кейін қаладағы білім беру инфрақұрылымы тағы бір нысанмен толығады.
Қазіргі уақытта Қонаев қаласында 10 мектеп жұмыс істейді. Оның тоғызы мемлекеттік білім беру ұйымы болса, біреуі жекеменшік мектеп. Қаладағы білім беру мекемелерінде 13 мыңнан астам оқушы білім алып жатыр. Халық санының өсуі мен тұрғын үй аумақтарының кеңеюі білім беру инфрақұрылымын дамытудың маңызын арттырып отыр. Әсіресе саяжай алқаптарында тұратын отбасылар үшін мектептің қолжетімділігі күнделікті өмір сапасына тікелей әсер етеді.
Осы тұрғыдан алғанда, жаңа мектеп құрылысы оқушы орындарының тапшылығын азайтып қана қоймай, балалардың білім алуына қолайлы жағдай жасауға мүмкіндік береді.
