Мемлекеттік сатып алудың ресми сайтындағы ақпаратқа сүйенсек, 2016 жылдан бері қала бойынша қоқыс шығарумен «Қапшағай АТО» ЖШС айналысады.
Қалалық ТҮКШ мамандарының айтуынша, аталған компания контейнерлер мен техниканы жаңартуға байланысты талаптарды орындай алмады. Осы себептен серіктестік 12 қыркүйектен бастап өз жұмысын тоқтатты. Енді бұл қызметті қаладағы «Kaz Alatau Service» ЖШС көрсететін болады.
«Біз 18, 19, 20, «Рауан», «Спутник», «Ивушка», «АТК», «МО-25», «Лесозавод» ш/а-дағы және Қойшыманов, Степная, Железнодорожная көшелерінің тұрмыстық қатты қалдықтарын шығаратын боламыз», — дейді серіктестік басшысы Рүстем Қасымханов.
Сондай-ақ әлеуметтік желілерде тұрғындар аулалардың ластануына шағымданды.
«Осыдан 3-4 күн бұрын 19 ш/а-дағы қоқыс контейнерлерін алып кетті. Енді есік алдында тұрмыстық қалдықтар үйіліп қалды. Мәселе қашан шешіледі?», — деп жазды Наталия есімді тұрғын.
Рүстем Қасымханов тұрғындардың шағымын ескере отырып, компанияның жұмысқа кірісіп кеткенін айтты.
«Ең бірінші қоқыс көп төгілген жерлерге контейнер қойып, сол аумақтарды тазалаймыз. Қазіргі таңда шағын аудандардың тізіміне сәйкес қоқыс шығару кестесі бекітіліп жатыр. Барлық сұрақтар бойынша 1 ш/а, 3 а үйіндегі серіктестік кеңсесіне жолығуға болады», — деді ол өз сөзінде.
Айта кетейік, алдағы уақытта қаланың басқа аудандарындағы қоқысты шығару қызметі және төлем тарифі туралы кеңінен жазатын боламыз.
