Бас прокуратураның Құқықтық статистика және арнайы есепке алу жөніндегі комитетінің статистикалық деректеріне сәйкес, іздеуде жүргендердің көбі 31-40 жас аралығындағылар. Астанада – 361, Алматы – 191, Ақтөбе – 143, Қостанай – 140, Жамбыл – 140, Павлодар – 108, Маңғыстау облысында 59 адамға іздеу салынған.
2023 жылдың 9 айында СДТБТ-да алимент төлеу жөніндегі міндеттерді қасақана орындамау фактілері бойынша 427 қылмыстық іс тіркелген (қылмыстық кодекстің 139-бабы). Айта кетсек, Қылмыстық кодекстің 139-бабы бойынша 600 сағатқа дейінгі мерзімге қоғамдық жұмыстарға тарту не екі жылға дейінгі мерзімге бас бостандығын шектеу не сол мерзімге бас бостандығынан айыру түріндегі жаза көзделген.
Аймақ бойынша мұндай қылмыстық құқық бұзушылықтадың ең көп бөлігі мына өңірлерде: Маңғыстау – 46, Алматы (о) – 45, Қостанай – 44, Шығыс Қазақстан – 43, Павлодар – 40, Қарағанды – 35, Абай – 32, Ақмола – 26, Солтүстік Қазақстан — 21, Астана (қ) – 17 облыстарында тіркелген.
Осы кезеңде Қылмыстық кодекстің 139-бабы бойынша 207 адам сотталды. 4 адам бас бостандығынан айырылды, 2 адам шартты түрде сотталды, 196 адамның бас бостандығы шектелді, 5-еуі қоғамдық жұмыстарға тартылды.
Жалпы алимент өндіріп алу туралы 309 670 атқарушылық іс орындауда болды. Бұл ретте балаларға ғана емес, ата-аналарын, жұбайын (зайыбын) күтіп-бағуға алимент өндіріп алынады:
- 291 886 атқарушылық іс — балаларды күтіп-бағуға арналған алимент бойынша;
- 773 атқарушылық іс — еңбекке қабілетсіз ата-аналарын күтіп-бағуға;
- 4 506 атқарушылық іс — еңбекке қабілетсіз жұбайын (зайыбын) күтіп-бағу өндірістері болды.
