Кәсіпорынға жоспардан тыс тексеріс жүргізген экологтар бес заң бұзушылықты анықтаған. Алайда, басшылық экологтар тапқан кемшілітердің кейбірін мойындамайтынын айтқан.
Еске салайық, 11 шілде күні кәсіпорында арнаулы сорғы істен шығып, Тараз қаласын түтін басқан еді. Салдарынан тұрғындардың денсаулықтары сыр берген. Арнайы құрылған комиссия зауыт басшылығы апат фактісін жасыруға тырысқанын анықтады.
Оқиға күкірт қышқылы цехында болған. Бірақ, бұл туралы ресми түрде екі сағаттан кейін ғана хабарланды. Экологтар ауа қабатын тексеріп, фторлы сутектің мөлшерден 7,5 есе артқанын анықтады. Одан кейін Елорда, Шымкент және Қарағанды облысының мамандары келіп, он күндік жоспардан тыс тексеріс жүргізді. Нәтижесінде, зауыттан шыққан күкірт триоксиді 18 минут бойы ауа қабатына тарап, бір тоннадан астам күкірт триоксидін шығарғанын айғақтады.
Мамандар бес бірдей заң бұзушылық болғанын растады. Зауыт басшылығы бір ай мерзімде аталған проблеманы жойып, айыппұл төлеуге міндеттелді. Талап дер кезіне орындалмаса, экологтар қатаң шаралар қолданатынын ескертті.
