Ауыл шаруашылығы министрлігінің мәліметінше, 2024–2025 жылдардағы қыркүйек-шілде аралығында экспорт көлемі 12,4 млн тоннаға жетіп, өткен маусыммен салыстырғанда 34%-ға артты (2023/2024 ж. — 9,3 млн тонна). Бұл — «ҚТЖ» компаниясының деректері бойынша есептелген астық эквивалентіндегі көрсеткіш.
Экспорт көлемінің артуы негізгі серіктес елдерге жеткізілімдердің ұлғаюымен байланысты:
Өзбекстанға – 28,2% өсім (4,3 млн тонна),
Тәжікстанға – 39,2% (1,4 млн тонна),
Қырғызстанға – 2,5 есе (398 мың тонна),
Иранға – 17,3 есе (974 мың тонна),
Әзербайжанға – 120 есе (723 мың тонна).
Маусымның басты жетістіктерінің бірі – экспорт географиясының кеңеюі. Қазақстан алғаш рет астықты Еуропаның бірнеше жаңа еліне — Бельгия, Польша, Португалия, Норвегия және Ұлыбританияға жөнелтті. Сонымен қатар, БАӘ, Вьетнам және Солтүстік Африка елдері де қазақстандық өнімге қызығушылық танытып отыр.
Ұлттық астық операторы – «Азық-түлік келісімшарт корпорациясы» АҚ желісі бойынша:
Мароккоға – 60 мың тонна,
Вьетнамға – 15 мың тонна бидай экспортталды.
Соңғы бес жылда тоқтап қалған бағыттар — Әзербайжан, Грузия және Түркияға жеткізілімдер қайта жанданды. Италияға қатты бидай экспорты да едәуір ұлғайды.
Ауыл шаруашылығы министрлігі экспорт көлемінің өсуі — қазақстандық астықтың әлемдік нарықтағы жоғары бәсекеге қабілеттілігінің, сондай-ақ агроөнеркәсіптік кешенді қолдау және логистиканы жаңғырту бойынша мемлекеттік шаралардың тиімділігінің дәлелі екенін атап өтті.
